Nakilala ang dalawang nasawi na sina Adel Martines, 34, binata, driver ng naturang bus at Baby Ballestin, 31, dalaga, isang empleyada ng JRS Manila at kapwa residente ng Barangay Tubli, Caramoran, Catanduanes.
Isa pang pasahero na nakilalang si Percival Siocson, ang nasa kritikal na kondisyon, samantala, marami pa rin pasahero ang iniulat na nasugatan at ngayon ay nasa ibat-ibang pagamutan.
Batay sa isinagawang imbestigasyon ng pulisya, naganap ang insidente dakong alas-5 ng hapon habang ang mini bus na may plakang EVD-787 na minamaneho ng nasawi ay mawalan ng kontrol at nagtuloy-tuloy na nahulog sa may 40 metro lalim na bangin.
Binanggit pa sa ulat na puno ng pasahero ang mini bus dahil ito ang huling biyahe patungo sa San Andres .
Tinataya ng mga awtoridad na aabot sa 70 katao ang lulan ng bus at maging sa tuktok nito ay may lulang pasahero ng maganap ang aksidente. ( Ulat ni Ed Casulla)