Sa panayam, sinabi ni Sulu Gov. Abdusakar Tan na bagamat hindi pa tuluyang nababawi ang lahat ng mga bihag ay malaki ang naitulong ng inilunsad na pag-atake ng militar laban sa grupo ng mga bandido upang mapanumbalik ang kapayapaan sa kanilang lugar.
Sinabi ni Tan na nabawasan ang kriminalidad sa Sulu hindi kagaya noong mga nagdaang panahon na hindi nawawalan ng kaso ng mga pagpatay sa loob ng isang araw o kaya naman ay mga bombahan sa kapitolyo ng Jolo.
Tiwala rin ang gobernador na tuluyang mawawakasan ang hostage crisis sa Sulu bago magtapos ang taon.
Sinabi naman ni Major Gen. Narciso Abaya, Commading General ng 1st Infantry Division (ID) at kasalukuyang chief ng Joint Task Force Trident na kakaunti na lamang ang puwersa ng Abu Sayyaf na siya ngayong target ng kanilang misyon.
Samantala, kasalukuyan pa ring napapaligiran ng tropa ng militar ang mga lugar na pinagdalhan sa nalalabi pang mga hostages na kinabibilangan ng black American na si Jeffrey Schilling na sinasabing naipasa na ng grupo ni ASG Spokesman Abu Sabaya sa grupo ni Kumander Mujib Abdurajak; ang orihinal na Sipadan hostage na si Roland Ullah, isang Filipino diving instructor at ang tatlong Malaysians na sina Muhammad Nur Sulaiman; Joseph Jongkinoh at Ken Wee Cheong.
Inaasahan namang marami pang miyembro ng ASG ang magsisisuko sa pamahalaan bunga na rin ng matinding pagkagutom kabundukan. (Ulat ni Joy Cantos)