Madi Mojdeh hataw agad sa NCAA
MANILA, Philippines — Nagparamdam agad ng lakas si La Salle Green Hills (LSGH) standout Behrouz Mohammad ‘Madi’ Mojdeh matapos humirit ng isang ginto at isang pilak na medalya sa pagsisimula ng NCAA Season 102 swimming competitions sa Rizal Memorial Sports Complex sa Manila.
Nagsanib-puwersa sina Mojdeh, Rodevic Gonzalvo, Gerald Esquivel at Ram Ubiadas upang masungkit ng kanilang tropa ang gintong medalya sa 4x50m medley relay.
Nairehistro ng LSGH quartet ang bilis na isang minuto at 51.82 segundo para makuha ang unang puwesto habang pumangalawa lamang ang Colegio de San Juan de Letran na may 1:55.25.
“I felt really good during the preliminaries, especially since it was my first time competing in the NCAA finals. But during warm-up, I started feeling a little heavy,” ani Mojdeh.
Sumiguro pa ng pilak si Mojdeh sa 200m backstroke kung saan nagtala ito ng 2:17.83 habang nanguna ang teammate nitong si Titus Rafael Sia na may impresibong 2:14.96.
Pumangatlo lamang si Aishel Cid Evangelist ng Emilio Aguinaldo College na may 2:18.79.
“I'm glad I still managed another personal best, a podium finish, and a relay gold with my teammates,” ani Mojdeh.
Puntirya ni Mojdeh na kumana pa ng medalya sa dalawang events nito sa second day ng torneo kung saan sasalang ito sa 400m freestyle at 200m breaststroke.
“I have the 400m freestyle and 200m breaststroke next. Hopefully, I can carry today's lessons into those races and perform even better,” dagdag ni Mojdeh.
Bumanat din ng pilak ang LSGH teammate nitong si Kristian Yugo Cabana sa 200m Individual Medley matapos magsumite ng 2:11.73.
Ito ang unang pagkakataon na sumalang si Cabana sa NCAA.
Gaya ni Mojdeh, may dalawang events pang lalahukan si Cabana sa ikalawang araw ng kumpetisyon.
Nagkasya lamang sa ikaapat na puwesto si Mojdeh sa 200m IM event tangan ang 2:13.42 na nailista nito.
- Latest
