4 EDSA busway operators, iniimbestigahan sa overcharging

MANILA, Philippines — Inimbestigahan ng Department of Transportation (DOTr) ang apat na kumpanya ng bus na nagpapatakbo sa EDSA Busway matapos makatanggap ng mga reklamo hinggil sa umano’y paniningil nang sobra o overcharging sa mga pasahero.

Ipinatawag ni Transportation Secretary Vince Dizon ang mga kinatawan at may-ari ng naturang mga kum­panya upang magpa­liwanag ukol sa mga reklamong isinampa laban sa kanila. Kasabay nito, nagbabala ang ahensya na hindi ito papayag sa anumang paglabag sa itinakdang pamasahe at magpapatupad ng kaukulang parusa kung mapatunayang nagkasala ang mga operator.

“Kung mapatuna­yan na talagang lahat sila nag-overcharge, tatanggalin ‘yung driver, tatanggalin ‘yung konduktor at papasuspinde ‘yung kumpanya,” ani Dizon.

Siniguro rin ng kalihim na mahaharap sa kahalintulad na parusa ang lahat ng public utility vehicles (PUVs) sa buong bansa na magkakaroon ng kahalintulad na paglabag.