Sen. Robin, sinubpoena sa ‘Bato escape’

MANILA, Philippines — Pinadalhan ng Department of Justice (DOJ) ng subpoena si Senator Robin Padilla kaugnay ng reklamong “obstruction of apprehension and prosecution of criminal offenders” o obstruction of justice.

Iniutos ng DOJ Panel of Prosecutors na humarap si Padilla sa mga petsang September 25, 2026 at October 9, 2026.

Pinagsumite rin si Padilla ng kanyang counter-affidavit at iba pang supporting documents.

Ang reklamo ay nagmula sa Philippine National Police criminal Investigation and Detection Group (PNP-CIDG).

Ito ay may kinalaman sa umano’y pagtulong ni Padilla kay dating PNP chief at Senador Ronald “Bato” dela Rosa para lumabas at “tumakas” mula sa mga pasilidad ng Senado noong madaling araw ng Mayo 14, 2026.

Ayon sa CIDG, ang pag-alis ni Dela Rosa sakay ng sasakyan ni Padilla ay isang planadong operasyon upang maiwasan ang pagka-aresto sa gitna ng umiiral na warrant mula sa International Criminal Court (ICC) na may kaugnayan sa drug war ni dating Pangulong Rodrigo Duterte.

Bukod kay Padilla, kasama rin sa respondents sa nasabing reklamo sina Lt. Jean Alia Yasan Robles, Virgilio Palaganas Carino Jr., at apat na John Does.