Website ng Kamara na-hack din

MANILA, Philippines — Na-hack din ang opisyal na website ng Kamara nitong Sabado, ilang araw matapos na una nang ma-hack ang website ng Senado.

Inako naman kahapon ng nagpakilalang mga ‘collective hackers’ na sila ang responsable sa ‘breach of security ‘.

Ang cyber attack sa website ng Kamara ay sa gitna na rin ng napipintong paglilitis ng Senate impeachment court laban kay Vice President Sara Duterte.

Iginiit ng mga hackers na ang pag-hack nila sa website ng Kamara ay bilang protesta sa korapsyon sa flood control projects ng gobyerno.

Magugunita na noong Huwebes ay hinack din ang website ng Senado kung saan kinondena ni Senate Pro Tempore at Acting Senate President Sherwin Gatchalian ang insidente.

Agad pinaimbestigahan na ng Kamara sa Department of Information and Communications Technology (DICT) ang cyber attack sa website nito.