Impeachment vs VP Sara ipadadala na sa Senado - solon

MANILA, Philippines — Kamara magbobotohan sa Lunes Nakatakdang ipadala na ng Kamara sa Senado ang Articles of Impeachment laban kay Vice President Sara Duterte anumang oras sa susunod na linggo.

Ito ang inihayag ni Manila 3rd District Rep. Joel Chua, miyembro ng House Committee on Justice kaugnay ng inaasahang botohan sa plenaryo sa Lunes, Mayo 11 sa impeachment laban kay VP Sara.

Nangangailangan ng 1/3 na boto o 106 Kongresista mula sa kabuuang 318 mambabatas sa Kamara na pabor sa impeachment bago ito tuluyang maipadala sa Senado para mag-convene bilang impeachment court.

“Ngayon hindi ko alam kung ura-urada. But anytime within that week, sigurado mata-transmit iyan, sa Lunes target na pagbotohan na,” ani Chua sa isang radio interview matapos namang makitaan ng “probable cause” ang impeachment.

Naniniwala rin si Chua na walang dahilan para mag-isyu ng Temporary Restraining Order (TRO) ang Korte Suprema para ipatigil ang impeachment dahilan binigyan nang sapat na panahon si VP Sara na dumalo sa pagdinig pero binalewala ito ng huli.

Binigyang diin pa ni Chua na hindi rin aniya dapat kuwestiyunin ang isyu ng  tamang proseso dahilan si VP Sara mismo ang nang-isnab sa subpoena  at bukod dito’y nasa kapangyarihan ng Kongreso ang impeachment bilang hiwalay na legislative body ng pamahalaan. -