‘Terorista’ arestado sa Pasay terminal

MANILA, Philippines — Isang lalaking pasahero na sinasabing may mataas na ranggo sa Communist Terrorist Group (CTG) ang dinakip ng mga operatiba ng Southern Police District (SPD) habang naghihintay ng pag-alis ng bus na kanyang sinakyan, sa EDSA Pasay City, Biyernes ng gabi.

Kinilala ni District Special Operations Unit (DSOU) chief, P/Lt. Colonel Antonio ­Ananayo Jr ang suspek na si alyas “Belho/ Yani”, 29-anyos, No. 8 Top Ten Most Wanted Person (TTMWP) Provincial Level ng Northern Samar.

Si Belho ay sinilbihan ng warrant of arrest ng mga operatiba ng DSOU, kasama ang District Intelligence Division (DID), at District Mobile Patrol Battalion (DMFB) ng SPD, sa kasong Attempted Murder na may inirekomendang piyansa na P100,000. Ang arrest warrant ay inisyu ni Hon. Ricardo Estavillo Amos, Presiding Judge ng Regional Trial Court Branch 22, Laoang, Northern Samar, noong Hunyo 30, 2021.

Ang akusado ay kasapi ng Sub-Regional Guerrilla Unit (SRGU), Eastern Visayas Regional Party Committee (EVRPC), at nasangkot umano sa tactical offensives laban sa tropa ng pamahalaan, kabilang ang Las Navas 2018 ambush.

Dati rin umanong miyembro ng Special Partisan Unit (SPARU) at inuugnay sa mga insidente ng pagpatay sa ilang CAFGU personnel sa Northern Samar.