50% discount sa MRT-3 at LRT-2 epektibo sa Marso 23
MANILA, Philippines — Simula sa Lunes (Marso 23) ay magkakaloob ang Department of Transportation (DOTr) ng 50% discount ang lahat ng pasahero ng Metro Rail Transit Line 3 (MRT-3) at Light Rail Transit Line 2 (LRT-2).
Ito ay alinsunod sa direktiba ni Pang. Ferdinand Marcos Jr. na pagaanin ang araw-araw na biyahe ng mga mananakay sa pamamagitan ng diskwento sa pamasahe, partikular na sa gitna ng patuloy na pagtaas ng presyo ng langis na lubos na nagpapahirap sa mga mamamayan.
Ayon kay Transportation Secretary Giovanni Lopez, malaki ang maitutulong ng naturang diskwento sa pamasahe sa tren para makatipid ang mga pasahero.
Ipinaliwanag pa ni Lopez na malaki ang matitipid ng mga biyahero kung sasakay ng tren na may discount sa pamasahe, sa halip na magdala sila ng sasakyan at kumonsumo ng napakamahal na langis.
Tiniyak ng DOTr na epektibo pa rin ang 50% discount para sa white beep cards ng mga senior citizens, persons with disabilities (PWD), at mga estudyante.
Magagamit din ang blue beep cards ng mga regular na pasahero para sa automatic na 50% discount.
Para naman sa mga walang beep cards, maaaring bumili ng single journey tickets na naka-50% discount din.
Tiniyak din ng DOTr na kasalukuyan na silang nakikipag-usap sa pamunuan ng LRT-1 kaugnay ng pagbibigay ng parehong discounted na pamasahe sa kanilang train line dahil pinatatakbo ito ng pribadong kumpanyang Light Rail Manila Corporation (LRMC).
- Latest
