Online selling sa Cebu pinadlock ng BIR
MANILA, Philippines — Pinadlock ng Bureau of Internal Revenue (BIR) ang online selling operation sa Cebu dahil sa hindi pagbabayad ng tamang buwis nang Hindi ideklara ang mahigit P211 milyon na benta.
Ito ay kasunod ng isinagawang imbestigasyon ng Regional Investigation Division ng Revenue Region No. 13 – Central Visayas, sa ilalim ng pangangasiwa ni Regional Director Douglas A. Rufino.
Ipinatupad ang closure order noong March 12 sa ilalim na rin ng BIR’s Oplan Kandado program.
Nag-ugat ang enforcement action sa magkasanib na imbestigasyon ng Bureau of Internal Revenue (BIR) at National Bureau of Investigation-Central Visayas Regional Office (NBI-CEVRO) matapos makatanggap ang mga awtoridad ng confidential na impormasyon tungkol sa isang online seller na nag-aalok ng mga luxury goods sa pamamagitan ng Facebook Live at iba pang digital platforms nang hindi nag-iisyu ng opisyal na resibo at walang wastong rehistro sa BIR.
Base sa isinagawang surveillance at tax compliance verification ng BIR at NBI, natunton ang operasyon sa Jamestown at Mabini Street sa Mandaue City, pati na sa Pahina Central sa Cebu City
Sa pagsusuri ng kanilang business records, lumalabas na nasa P211 milyon ang gross sales nito.
Dahil dito, sinabi ng BIR na ang minimum na pananagutang buwis ay umaabot sa P40.4 milyon, kasama na ang mga surcharge at multa, alinsunod sa National Internal Revenue Code.
- Latest
