Panukalang ‘emergency powers’ ni Marcos, aprub sa Senate panel

MANILA, Philippines — Inaprubahan nitong Miyerkules ng Senate Committee on Ways and Means ang mga panukalang batas na magpapahintulot kay Pangulong Ferdinand “Bongbong” Marcos Jr. na suspindihin o bawasan ang excise tax sa gasolina dahil sa tumitinding tensyon sa Gitnang Silangan.

Sinabi ni Senador Pia Cayetano, chairperson ng komite, na hihintayin niya ang pag-apruba ng House of Representatives ng sarili nilang bersyon ng panukalang batas sa ikatlong pagbasa at ­ipadala ito sa Senado bago ito i-sponsor sa plenaryo.

Inaasahan na sa Lunes o sa susunod na linggo maisasalang ang panukala para sa deliverasyon at pagbotohan sa plenaryo.

Sinabi rin ni Cayetano na ang komite, sa pakiki­pagtulungan ng Department of Energy (DOE) at Department of Finance (DOF), ay hindi pa natatapos ang ilang detalye tungkol sa bersyon ng Senado ng panukalang batas.

Sinabi ni Cayetano na mayroong 10 panukalang batas sa Senado tungkol sa suspensyon o pagbawas ng excise taxes sa mga produktong gasolina o petrolyo.

Una nang sinabi ni Marcos na sesertipikahang “urgent” ang panukalang batas na magbibigay sa kanya ng special power.