E-trikes bawal na simula Disyembre

MANILA, Philippines — Simula Disyembre 1 ay hindi na papayagan ang mga electric tricycle o e-trikes sa mga pangunahing kalsada,ayon sa mga opisyal ng transportasyon.

Sa deliberasyon ng budget ng Land Transportation Office (LTO) para sa susunod na taon, pinuna ni Sen. Raffy Tulfo ang pagdami ng mga e-trikes na itinutu­ring na aniyang “hari ng kalsada” na dating tawag sa mga jeep.

Sinabi ni Sen. JV Ejercito, sponsor ng badyet na nangako si LTO Chief Assistant Secretary Markus Lacanilao na sisimulan ang paghuli sa mga e-trikes na tumatakbo sa mga pampublikong kalsada pagsapit ng Disyembre Uno.

Sinuportahan ni Tulfo ang hakbang,na binanggit ang mga pasanin ng mga tradisyunal na drayber ng tricycle na sumusunod sa mga kinakailangan sa prangkisa, rehistrasyon at pagkuha ng lisensiya.

Ipinunto ni Tulfo na ang mga driver ng e-trikes ay hindi na kailangang kumuha ng lisensiya.

Idinagdag ni Tulfo na kapag ang mga e-vehicle ay naaksidente o lumabag sa mga patakaran sa trapiko, nahihirapan ang mga otoridad na mag-isyu ng citation dahil wala naman silang lisensiya.

Sinabi ng LTO sa mga senador na ang anumang e-trike na sangkot sa isang insidente sa kalsada ay otomatikong kukumpiskahin.