Impeach trial vs VP Sara, maaaring ituloy – law expert

MANILA, Philippines — Bagama’t nagdesisyon na ang Supreme Court na “unconstitutional” ang articles of impeachment laban kay Vice President Sara Duterte, inihayag kahapon ng isang constitutional law expert at dating Integrated Bar of the Philippines (IBP) president na si Atty. Domingo “Egon” Cayosa na maaaring magdesisyon ang Senado na ituloy ang trial.

Sa panayam sa radio, ipinaliwanag ni Cayosa na bilang legislative branch ay maaaring igiit ng Senado ang “exclusive power” nito sa mga bagay na may kinalaman sa impeachment.

Sinabi niya na ang susunod na hakbang ay depende sa aksyon ng mga senador at kung mayroon silang sapat na suporta upang ituloy ang paglilitis.

“It is now for the legislative branch of government to defer to that ruling, o kaya if they have political will and numbers, maaari nilang ituloy. Sapagkat malinaw naman sa Konstitusyon, pagda­ting sa impeachment, that is the sole power of the legislative branch,” ani Cayosa.

Nilinaw din niya na maaring hindi sumunod ang Senate at House of Representatives sa kautusan ng SC.

“Puwede kung igigiit nila ‘yung kanilang exclusive power sa proseso ng impeachment. Of course, ‘yung iba, sinasabi mag-defer na lang diyan sa Supreme Court. But malinaw ho kasi ang Constitution pagdating sa impeachment, it is for the Senate to decide, ‘yan ang impeachment court,”ani Cayosa.

“Insofar as some people think there is judicial overreach, eh maaari naman yang i-disregard ng Senado at ituloy,” aniya pa.