Taas-matrikula nakaamba sa susunod na pasukan

MANILA, Philippines — Nakaamba ang pagtataas ng matrikula ng mga estudyante matapos na ilang private schools ang humihiling na ng tuition fee increase sa susunod na pasukan.

Ito ang sinabi ng Coordinating Council of Private ­Educational Associations of the Philippines (COCOPEA) makaraang magsipag-applay umano sa asosasyon ang mga kasaping private schools para sa tuition fee increase.

Ayon sa grupo, masyado nang matagal ang panahon na walang taas singil sa matrikula sa mga pribadong paaralan. Sinasabing ang 70 percent sa tuition fee increase ay gagamitin sa pagtataas sa sahod ng kanilang mga guro.

“To respond to the inflation and the difficulty, economic difficulties being experienced by our parents, we cannot help but also apply for tuition increase ranging from 3% to 9%, 12%,” ayon kay  COCOPEA chairman Fr. Albert Delvo.

Binigyang diin naman ni COCOPEA legal counsel Kristine Carmina Manaog na panahon na para maipatupad ang tuition fee hike sa mga pribadong paaralan dahil noon pang bago mag-pandemic ay nagsipag-apply na rin ang mga ito ng taas matrikula.

Inaalam na ng Department of Education (DepEd) ang impormasyon sa mga private schools na nag-aplay para sa tuition fee hike.

Ayon naman sa Commission on Higher Education, pag-uusapan pa ang bagay na ito ng Commission en Banc.