Magpinsang paslit nalunod sa beach resort

MANILA, Philippines — Isang magpinsang paslit ang nasawi nang sila ay malunod beach resort kung saan ay ginaganap ang reunion sa Barangay Sabang Silangan, Ca­tanauan, Quezon, ka­makalawa ng hapon.

Kinilala ng pulisya ang mga biktima na sina “Trisha”, at “Jayrence”, kapwa 6-anyos at mga residente ng Barangay 10, Catanauan, Quezon.

Sa imbestigasyon ni Pat. Leomar Bagsit, nagtungo sa beach resort ang magkakaanak, ala-1:30 ng hapon upang magdaos ng kanilang family reunion.

Nang makalingat umano ang mga magkakaanak ay nagtu­ngo ang magpinsan sa dalampasigan at kagyat na nagtungo sa dagat saka naglangoy.

Dahil malakas ang hampas ng alon ay tina­ngay ang magpinsan sa malalim na parte ng dagat at nang mapansing nawawala ang mga ito ay pinagtulung-tulungang hanapin.

Makalipas ang mahigit sa isang oras ay natagpuan ang dalawa na nakalutang at mabilis na dinala sa Bondoc Peninsula District Hospital, subalit nalagutan at idineklarang dead on arrival.