Hipag sinaksak ng bayaw, patay

MANILA, Philippines — Isang 41-anyos na ginang ang idineklarang dead-on-arrival sa ospital matapos na saksakin ng kanyang bayaw sa gitna ng kanilang pagtatalo sa harap ng kanilang bahay sa Purok-5, Brgy. Tariric, Minalabac, Camarines Sur, kamakalawa ng hapon.

Kinilala ang nasawi na si Rowena Sapinoso, may-asawa, residente ng naturang barangay. Agad namang naaresto ang bayaw na suspek na kinilalang si Vergel Sapinoso, 44-anyos, construction worker.

Sa ulat, bago nangyari ang krimen, alas-4:00 ng hapon ay nasa harap ng kanilang bahay ang biktima nang dumating ang suspek at sa hindi malamang dahilan ay nagtalo ang dalawa.

Sa gitna nang mainit na pagtatalo ay umuwi sa kanyang bahay ang suspek at pagbalik ay armado na ito ng patalim at agad inundayan ng saksak ang hipag sa ­tiyan na duguang humandusay.

Mabilis na isinugod ng mga kaanak at residente ang duguang biktima sa Bicol Medical Center sa Naga City pero idineklarang dead-on-arrival.