4 drug dealer na nag-parcel ng shabu, arestado

MANILA, Philippines — Apat na sinasabing mga big time drug dealer na nagpapa-parcel umano ng shabu na magkakahalaga ng P6.8 milyon sa kanilang mga kliyente sa Quezon City ang naaresto nitong Biyernes ng gabi.

Kinilala ang mga naarestong suspek na sina alyas Ron-Ron, 38; Jay-Jay, 37; Ken, 35, at Jap, 22, na nadakip sa isang apartment building sa Brgy. E. Rodriguez Sr., nitong Biyernes ng gabi.

Paliwanag ng Philippine Drug Enforcement Agency (PDEA), nakatanggap sila ng impormasyon na isang rider ng isang delivery platform o courier service ang napapansin na madalas nagpi-pick up ng parcel sa apartment.

Nabatid na  namonitor umano ng mga opisyal sa barangay ang mga kahina-hinalang galaw ng mga suspek sa CCTV kaya naman agad na nagkasa ng operasyon laban sa mga suspek.

Dito ay nakumpirma ng mga otoridad ang modus ng mga suspek na mag-book ng delivery o courier service para maihatid sa kanilang mga parokyano ang illegal na droga.

Nakuha sa mga suspek ang nasa 1 kilo ng shabu na nagkakahalaga ng P6,800,000.