Mag-asawa timbog sa P3.4 milyong shabu drug bust

MANILA, Philippines — Isang mag-asawa ang naaresto ng mga ahente ng Philippine Drug Enforcement Agency-Bangsamoro Autonomous Region in Muslim Mindanao (PDEA-BARMM) sa isinagawang buy-bust operation, kamakalawa sa Cotabato City.

Kinilala ni PDEA-BARMM director Gil Cesario Castro mag-asawang suspek na sina ‘Theng’ at ‘Saima’ na mga residente ng Sultan Kudarat, Maguindanao del Norte.

Nabatid na nakakalap ng impormasyon ang PDEA hinggil sa operasyon ng mag-asawa kaya agad na ikinasa ang buy-bust sa Brgy.Poblacion 5,Cotabato City at nakuha sa kanila ang nasa 500 gramo ng shabu na nagkakahalaga ng P3.4 milyon,buy-bust money;dalawang cellphones, wallets, at mga identification cards.

Nasa kustodiya na ng PDEA BARMM Jail Facility ang mag-asawa na mahaharap sa kasong paglabag sa Republic Act 9165 o Comprehensive Dangerous Drugs Act of 2002.