3 miyembro ng pamilya, todas sa salpok

MANILA, Philippines — Tatlong miyembro ng isang pamilya na ang isa ay buntis ang agad nasawi matapos sumalpok ang kanilang sinasakyan sa railings ng highway habang patungo sana sa isang kaanak para sa pagsalubong sa Bagong Taon, naganap noong Miyerkules sa Barangay Central Malamote, Matalam, Cotabato.

Kinilala ang mga nasawi na sina Almira Pillado; ang buntis na si Michelle Pillado at kamag-anak nilang si Liza Rulida, kapwa residente ng Barangay Dalipe, Mlang, North Cotabato.

Habang nasugatan ang pitong iba pa kabilang ang driver ng sasakyan na si Dennis Tayco Pillado na mister ng isa sa nasawi; at apat na bata na nagtamo ng malubhang mga sugat at pasa sa katawan.

Sa ulat, patungo sana sa Barangay Lumonay, President Roxas, Cotabato ang mga biktima upang dumalo sa isang New Year’s celebration ng mga kamag-anak doon nang biglang nawalan ng kontrol sa manibela ang driver ng kanilang sasakyan na si Dennis dahil sa mechanical kaya ito ay bumangga sa highway side railing kaya’t tumilapon at bumagsak sa kalsada ang mga sakay na agad ikinasawi ng tatlo sa kanila.