Karambola sa Skyway: 1 todas, 6 kritikal
MANILA, Philippines — Isa ang nasawi habang anim ang nasa malubhang kalagayan nang masangkot ang kanilang sasakyan sa naganap na karambola matapos na araruhin ng isang Isuzu truck na nawalan ng preno sa Skyway sa bahagi ng Barangay Sun Valley, Parañaque City, kamakalawa ng gabi.
Inaalam pa ang pagkakilanlan ng isang nasawi, habang ginagamot naman sa Asian Hospital ang anim na umano ay nasa malubhang kalagayan.
Agad na naaresto ang driver ng Isuzu Truck na si Sonny Palen, 53, na mahaharap sa reklamong Reckless Imprudence Resulting in Homicide at Multiple Physical Injury with damaged to properties.
Sa ulat ng SLEX Sub-Office kay P/Colonel Joel Jucutan, hepe ng Regional Highway Patrol Unit-National Capital Region (RHPU-NCR), alas-7:45 ng gabi nang maganap ang insidente sa nabanggit na bahagi ng Skyway.
Ang mga sasakyang nasangkot na pawang tinatahak ang southbound direction sa left most lane nang mawalan ng preno ang Isuzu truck at nabundol ang Isuzu Dmax, na bumundol sa Mitsubushi L300, Kawasaki Ninja, GAC SUV at Mitsubishi Mirage.
- Latest
