2 drug dealer tiklo sa P5.7 milyong shabu

MANILA, Philippines — Dalawang drug dealer ang naaresto at nasamsam sa kanila ang nasa P5.7 milyon halaga ng shabu sa isang drug operation sa  Barangay Santa Barbara sa Zamboanga City, kama­kalawa ng gabi.

Kinilala ni Brig. Gen. Bowenn Joey Masauding, director ng Police Regional Office-9, ang dalawang naarestong suspek na sina Nasser Ibrahim Usman, 63; at Frasel Saluay Sahibeini, 48.

Hindi na pumalag ang dalawang suspects nang arestuhin ng mga hindi unipormadong mga operatiba ng Zamboanga City Police Office at ng PRO-9 na kanilang nabentahan ng 850 gramo ng shabu sa isang lugar sa gilid ng Martha Drive sa Barangay Santa Barbara pasado alas-7:00 ng gabi at nakatakdang sampahan ng paglabag sa illegal drugs.