Pangulong Marcos: Sundalo, uniformed personnel bibigyan ng 1-time rice assistance

MANILA, Philippines — Mabibigyan ng one time rice assistance ang mga sundalo at iba pang uniformed personnel para sa taong ito, matapos itong apruhaban ni Pangulong Ferdinand “Bongbong” Marcos Jr.

Sa Administrative Order No.26 na nilagdaan ni Executive Secretary lucas Bersamin, maliban sa mga sundalo, makatatanggap din ng rice allowance ang mga miyembro ng Philippine National Police (PNP), Bureau of Fire Protection (BFP), Bureau of Jail Management and Penology (BJMP), at  Philippine Public Safety College na nasa ilalim ng Department of Interior and Local Government (DILG)

Kasama rin sa mabibigyan ng. biyaya ang mga taga Bureau of Corrections na nasa ilalim ng Department of Justice, Philippine Coast Guard gayundin ang National Mapping and Resource Information Authority na ilalim naman ng Department of Environment and Natural Resources.

Base pa sa Administrative Order na ang distribusyon ng rice assistance ay sisimulan sa susunod na buwan hanggang Marso 2025.

Manggagaling ang bigas na ipamamahagi mula sa local at participa­ting farmers o magsasaka ng Kadiwa ni Ani Kita o KADIWA Program ng Department of Agriculture. Habang kukunin naman ang pondo sa contingent fund na huhugutin mula sa General Appropriations Act ngayong taon.