Kaso ni Alice Guo na qualified human trafficking isasampa sa Pasig RTC

MANILA, Philippines — Ngayong linggong ito ay nakatakda nang ihain ng Department of Justice (DOJ) ang kasong qualified human trafficking laban kay dismissed Bamban, Tarlac Mayor Alice Guo sa Pasig City Regional Trial Court (RTC).

Kasunod na rin nang pagpayag ng Supreme Court (SC) sa hiling ng DOJ na mailipat ang pagdinig sa naturang kaso mula sa Capas, Tarlac Regional Trial Court (RTC) Branch 66 patungo sa Pasig RTC.

Nabatid na bukod kay Guo, kakasuhan din ang kanyang mga umano’y business partners, na kinabibilangan ng umano’y POGO “big boss,” na si Huang Zhiyang.

Nauna rito, lumiham si Justice Secretary Jesus Crispin Remulla kay Chief Justice Alexander G. Gesmundo noong Abril 22 at hiniling sa Mataas na Hukuman na mailipat ang criminal case numbers 9855-9857 (PP vs Ma The Pong, Wang Weili, Lang Xu et al.) mula sa Capas, Tarlac RTC patungong Metro Manila na kalaunan ay pinahintulutan naman ng Korte Suprema ang hiling.

Kumpiyansa rin ang DOJ na sapat ang kanilang ebidensiya upang mapanagot ang mga respondents sa mga kasong kinakaharap ng mga ito.

Ayon sa DOJ, ang mga kaso sa ilalim ng Republic Act 9208, o The Anti-Trafficking in Persons Act of 2003, ay non-bailable at may katapat na parusang habambuhay na pagkabilanggo.

Una na rin namang nailipat ang graft case na kinakaharap ni Guo sa Valenzuela RTC.

Bukod sa qualified human trafficking at graft case ay nahaharap din sa mga rek­lamong tax evasion at money laundering sa DOJ si Guo.