Karagdagang pabuya para sa pag-aresto kay Quiboloy, pinag-aaralan ng PNP
MANILA, Philippines — Para sa agarang pagdakip sa puganteng si Kingdom of Jesus Christ leader Pastor Apollo Quiboloy ay pinag-aaralan na ngayon ng Philippine National Police (PNP) ang pagdadagdag ng reward money o pabuya.
Sa pulong balitaan sa Camp Crame kahapon, sinabi ni PNP Public Affairs Office Chief Police Col. Jean Fajardo, na ikinokonsidera na rin nila na dagdagan pa ang P10 milyong reward na mula sa ilang mga private citizens.
Gayunman, sinabi ni Fajardo na kailangan pa ring dumaan sa tamang proseso alinsunod sa auditing, budgetary rules, at guidelines.
Sinabi ni Fajardo na hindi maikakaila na positibo ang tugon sa isyu matapos na inanunsyo ni Interior and Local Government Secretary Benhur Abalos ang paglalabas ng P10 milyong reward money.
Dahil dito, maraming tawag na rin ang natatanggap ng PNP hinggil sa lokasyon ni Quiboloy, subalit ang lahat aniya ay dumaraan sa beripikasyon.
Umapela si Abalos kay Quiboloy na sundin na lamang ang batas at harapin sa korte ang mga alegasyon laban sa kanya at mas magiging magaan at maayos ang proseso kung makikipagtulungan si Quiboloy sa mga otoridad.
- Latest
