Crackdown vs unconsolidated PUVs, larga na – LTFRB

MANILA, Philippines — Sisimulan na ng Land Transportation Franchising and Regulatory Board (LTFRB) ang panghuhuli ng mga pampasaherong sasakyan katulad ng mga passenger jeepneys na hindi na-consolidate.

Ayon kay LTFRB Chairman Teofilo Guadiz, tatlong lugar ang target ng kanilang operasyon laban sa mga unconsolidated PUVs kasama ang Land Transportation Office (LTO) at Metro Manila Development Authority (MMDA).

Binigyang diin ni Guadiz na hindi mabibigyan ng confirmation ng LTFRB ang mga sasakyan na hindi consolidated kaya hindi ito mairerehistro sa LTO at ito ay maituturing nang isang colorum vehicle.

Aniya, ang mga colorum vehicles ay hindi maaaring maipasada at magsakay ng mga pasahero.

Ang driver ng unconsolidated vehicle na mahuhuli ay kukumpiskahin ang driver’s license, babaklasin ang plaka ng sasakyan at dadalhin sa LTO impounding area sa Tarlac.

Una rito, nagbanta ang transport groups na Manibela at PISTON na muling magsasagawa ng kilos-protesta sa Korte Suprema para igiit na magpalabas ng TRO laban sa PUV Modernization.

Ang consolidation ang paunang hakbang sa PUV Modernization Program ng pamahalaan.