Estudyante nanghalay ng lasing na estudyante, tiklo
MANILA, Philippines — Inaresto ng mga otoridad ang isang 18-anyos na estudyante matapos na ireklamo ng kanyang kapwa estudyante na ginahasa nito habang natutulog dahil sa kalasingan sa loob ng tahanan nito sa Malate, Manila.
Kinilala ang suspek na si Allan Detorres, 18, Grade 11 student, at residente ng La Purisima St., Paco, Manila na inaresto, alas-10:00 ng gabi sa kanyang bahay, bunsod ng reklamo ng 13-anyos na biktima, isang Grade 8 student.
Sa ulat ng Malate Police Station 9 (PS9) ng Manila Police District (MPD), alas-10:00 ng gabi ng Abril 30 nang maganap ang krimen sa tahanan ng biktima sa Espiritu St., Malate.
Bago ito ay nagkayayaan umano ang suspek at biktima na mag-inuman kasama ang pito pa nilang kaibigan.
Matapos umanong makakonsumo ng dalawang bote ng gin ang biktima ay nalasing na ito at nahilo kaya’t nagdesisyon nang matulog sa loob ng kanyang silid.
Nagising na lang umano ang biktima nang makaramdam ng pananakit ng kanyang pagkababae at nang imulat ang kanyang mata ay nakitang nakapatong na ang suspek sa kanya at isinasagawa ang panggagahasa.
Tinangka pa umano ng biktima na manlaban ngunit nagawa pa rin ng suspek na ilugso ang kanyang puri.
Dakong alas-8:00 ng gabi kamakalawa ay kaagad na nagtungo sa pulisya ang biktima kasama ang kanyang ina at inireklamo ang suspek na agad din inaresto.
Nakapiit na ang suspek at mahaharap sa kasong statutory rape at paglabag sa Republic Act 7610 o Anti-Child Abuse Law.
- Latest