Rider tepok sa salpok ng kotse

MANILA, Philippines — Namatay noon din ang isang motorcycle rider nang mabangga ng kotse habang tumatawid sa isang kalsada sa Cainta, Rizal, kamakalawa.

Kinilala ang nasawi na si Albert dela Cruz, nasa hustong gulang habang nasa kustodiya na ng mga otoridad ang suspek na si Jentonie Kuyan.

Sa ulat ng Cainta Municipal Police Station, alas-2:30 ng madaling araw nang maganap ang aksidente sa Felix Ave­nue, Brgy. San Isidro, Cainta, Rizal.

Nauna rito, sakay ang biktima ng isang Yamaha Mio Aerox na may plate number 228NJX at bumibiyahe mula sa direksiyon ng V.V. Soliven III.

Habang minamaneho naman ng suspek ang isang Honda CR-V wagon na may plakang TIE-390 at binabagtas ang Felix Avenue patungong direksiyon ng Marcos Highway mula sa Junction, Cainta.

Habang tumatawid sa Felix Avenue ang motorsiklo ng biktima ay nabangga ng kotse ng suspek, na noon ay sinasabing mabilis umano ang takbo.

Sa lakas nang salpok ay nahulog ang biktima mula sa kanyang motorsiklo at bumagsak sa sementadong kalsada na nagresulta sa matinding pagkasugat nito at malaunan ay kamatayan.

Lumitaw sa imbestigasyon ng pulisya na kapwa walang driver’s license ang suspek at biktima habang expired na rin ang rehistro ng kotse.