2 killer ng binata, todas sa engkwentro
MANILA, Philippines — Napatay ng mga tauhan ng Lucena City Police Station ang dalawa sa tatlong lalaki na pumatay sa isang binata sa loob ng bahay nito, kamakalawa ng gabi sa Barangay Antipolo, Sariaya Quezon.
Kinilala ang mga napatay na suspek na isang Alias “Bin Laden”, tinatayang nasa 38-anyos, residente ng Purok Tanglaw, Barera, Brgy. 8, Lucena City at isang Alias “Palos” nasa hustong gulang, habang naaresto ang kasama nila na si Alias “Soya”, 33, ng Purok Talabis, Brgy. Ibabang Iyam, Lucena City.
Lumalabas sa inisyal na imbestigasyon na bago naganap ang engkwentro ay nakatanggap ng impormasyon si PCpl Michael Carurucan ng Cotta Sub-station tungkol sa pamamaril ng mga suspek sa biktimang si Michael Joshua Ranas Timajo, 20, binata sa loob ng kanilang bahay sa Purok Tanglaw, Barera, Brgy. 8 Lucena City.
Nasa loob ng bahay si Timajo at abala sa pag-aayos ng kanyang ear pods nang pasukin ng mga suspek at pagbabarilin na nagresulta sa agarang pagkamatay nito.
Mabilis na tumakas ang mga suspek patungo sa direksyon ng Brgy. Ibabang Iyam, Lucena City at agad nagsagawa ng dragnet operation ang mga LCPS na nagresulta sa pagkakaaresto ni Alyas Soya na nagturo na ang kanyang mga kasama ay tumakas patungong Sariaya.
Sa hot pursuit operation ay nakaengkwentro ng mga otoridad sina Alyas Bin Laden at Alyas Palos sa Brgy. Antipolo, Sariaya na sa halip sumuko ay nanlaban ang mga ito kaya’t napatay.
Lumalabas naman sa imbestigasyon na si Alyas Bin Laden ay pangunahing suspek sa isang insidente ng pamamaril sa Lucena noong nakaraang buwan.
- Latest