Mag-ina sinaksak ng lasing na kapitbahay
MANILA, Philippines — Isang mag-ina ang nasa loob ng kanilang bahay nang pasukin at pagsasaksakin ng lasing nilang kapitbahay sa Barangay Tala, San Andres, Quezon, kamakalawa ng hapon.
Namatay habang nilalapatan ng lunas sa ospital ang biktimang si Leonor Beñegas y Absalon, 56 habang patuloy na inoobserbahan ang anak nitong si Rosalie Ortega y Absalon, 34.
Ang suspek na tumakas na nahaharap sa reklamong murder at frustrated murder ay nakilala lamang sa alyas na Garry, 36.
Base sa imbestigasyon, habang nasa loob ng kanilang bahay ang mag-ina, alas-5:30 ng hapon ay pumasok ang lasing na suspek na armado ng gulok at walang sabi-sabing pinagsasaksak si Leonor.
Nang makita ni Rosalie ang ginagawa ng suspek sa kanyang ina ay sinubukan nitong tumulong, subalit maging siya ay inundayan ng sunud-sunod na saksak.
Matapos isagawa ang krimen ay naglakad na tumakas ang suspek patungo sa bulubunduking bahagi ng barangay.
Inaalam ngayon ng pulisya ang motibo ng suspek sa ginawang krimen sa mag-ina.
- Latest