4 killer ng lady executive hinatulan ng reclusion perpetua

MANILA, Philippines — Reclusion perpetua o 40 taon na pagkakulong ang iginawad na hatol ni Judge Salvador Timbang, Branch 253 ng Las Piñas City Regional Trial Court sa apat na lalaki na akusado sa pagnanakaw at pagpatay sa isang lady advertising executive noong 2013 nang mapatunayang nagkasala ang mga ito.

Kinilala ang apat na guilty sa kasong pagnanakaw at pagpatay sa biktimang si Kristelle Davantes, 25 na sina Samuel Decimo, Lloyd Benedict Enriquez, Kelvin Jorek Evangelista at Jomar Pepito.

Ayon sa korte na matibay ang testimonya ng saksing si Reggie Diel at walang duda na positibo ito sa pagkakakilanlan ng mga akusado.

Lumilitaw na pinagplanuhan ng mga akusado ang pagnanakaw at pagpatay kay Davantes na ang bangkay ay natagpuan sa isang tulay sa Silang, Cavite na may pasak ng panyo ang bibig at nakagapos ang kamay at leeg na may tama ng saksak.