‘Implementing rules’ ng ‘Bawal Bastos Law’ nilagdaan na

MANILA, Philippines — “Sa wakas, may IRR na ang Bawal Bastos Law! Bilang na ang mga araw ng mga ‘Boy Bastos’ at lahat ng sino man na gagawa ng gender-based public harassment.”

Ito ang sinabi ni Sen. Risa Hontiveros nang lagdaan kahapon ang implementing rules and regulations (IRR) ng Republic Act 11313 o Safe Spaces Act na kilala rin sa tawag na “Bawal Bastos” law.

Ipinagbabawal sa nasabing batas ang panunutsot, pagsipol, sexist, sexual advances at lahat ng uri ng pambabastos sa mga pampublikong lugar, trabaho, eskuwelahan at maging sa online o internet.

Naniniwala si Hontiveros na magkakaroon na nang pagbabago sa mga gender-based harassment at makikinabang din dito ang mga miyembro ng LGBT community.