Amok sa Las Piñas: 3 patay
MANILA, Philippines — Pinatay muna ng isang lalaking nag-amok ang kanyang kapitbahay at 16-anyos na stepson bago siya napatay ng mga rumespondeng pulis kahapon ng hapon sa Brgy. CAA, Las Piñas City.
Ang mga nasawing biktima ay kinilalang sina Danilo Bilog, 35, negosyante; at Reniel Nonato, 16. Habang napatay ng mga pulis ang suspek na si Renan Fulgencio, nasa hustong gulang at residente ng Brgy. Balikatan.
Sa ulat ng pulisya, bago nangyari ang krimen dakong alas-5:00 ng hapon nang una nitong sinaksak at napatay ang stepson na si Nonato sa loob ng kanilang bahay.
Nang tumakas ay nabundol niya ang kapitbahay na si Bilog na kanya ring pinagsasaksak at nang mapatay ay muling bumalik sa loob ng kanyang bahay.
Nang rumesponde ang mga pulis para arestuhin ang suspek ay una nilang inakala na hino-hostage ni Fulgencio si Nonato kaya naging maingat ang kanilang galaw at nakipagnegosasyon pa sa suspek.
Nang lapitan ng mga pulis ang kinaroroonan ng suspek ay inatake sila nito ng saksak kaya’t pinagbabaril nila ito at napatay.
Isinugod sa pagamutan si Fulgencio ngunit hindi na ito umabot ng buhay at dito ay nadiskubre ng mga pulis ang wala nang buhay na si Nonato sa loob ng kanilang bahay.
Tinitignan ng mga pulis ang anggulong selos sa pamamaslang na sangkot ang kanyang misis at stepson.
- Latest
