2 negosyante itinumba

MANILA, Philippines — Dalawang negosyante ang pinatay ng hindi pa kilalang mga gunman sa magkahiwalay na insidente ng pamamaril sa Quezon City at lalawigan ng Nueva Ecija.

Sa Quezon City, dakong alas-7:20 ng umaga kahapon nang pagbabarilin ang biktima na si Hanson Maranan, 45, sa harap ng kanyang tindahan sa Old Samson Road, Bgy. Apolonio Samson ng mga suspek na sakay ng itim na NMax motorcycle na kapwa nakasuot ng helmet.

Idineklarang dead-on-arrival ang 69- anyos na si Manuel Reyes, negosyante nang pagbabarilin ng isang lalaki na pumasok sa kanyang bahay sa Barangay San Francisco, San Antonio, kamakalawa ng alas-12:25 ng tanghali noong Sabado.

Nabatid na nagpapahinga ang biktima nang bigla umanong dumating ang hindi pa nakikilalang suspek sa bahay at walang kaabug-abog na pagbabarilin.

Tumakas ang suspek na nakasuot ng kulay berdeng t-shirt at maong pants sakay ng isang walang plakang motorsiklo.