Dalaga bugbog sarado sa ex-bf

MANILA, Philippines — Bugbog sarado ang inabot ng isang 31-anyos na dalaga mula sa dating nobyo na hindi matanggap ang ginawa nitong pakikipaghiwalay naganap kamakalawa sa Brgy. Payawan, Lamut, Ifugao.

Ang biktima na nagpatago sa pangalang Susan ay dumulog sa pulisya upang ireklamo ang pananakit sa kanya ng dating kasintahan na si Mario, 27.

Sa salaysay ng biktima, dakong alas-3:30 ng hapon ay nagpapahinga ang biktima sa silid ng bahay ng pinsan nang dumating ang suspek at pasigaw na tinatawag ang kanyang pangalan para sila ay mag-usap.

Hindi ito pinansin ng biktima kaya’t nagalit ang suspek at pinasok ang silid saka pinagbubugbog, pinagsisipa bago inuntog pa ang ulo ng biktima sa pader.

Matapos na makaalis ang suspek ay nagreklamo ito sa pulisya na agad pinuntahan ang suspek sa kanyang bahay at inaresto.