Hotel owner tinodas

MANILA, Philippines – Idineklarang dead on arrival ang isang 36-an­yos na negosyante nang ito ay pagbabarilin ng dalawang lalaki sa loob ng pag-aaring hotel sa bayan ng Sto. Tomas, Batangas kamakalawa.

Ang nasawi ay kinila­lang si Jussein San Juan, residente ng Ayala Alabang Village, Muntinlupa, tubong Poblacion 2,  Tanauan City Batangas at may-ari ng Junction Inn Mansion Hotel sa Barangay Uno, Sto.Tomas, Batangas.

Ang pamilya San Juan ay nagmamay-ari ng San Juan Jewelry and Pawnshop, isang gas station at drive-in motel sa Barangay Pagaspas, Tanauan City.

Batay sa ulat, dakong alas-10:45 ng umaga ay dumating ang dalawang lalaking suspek na nagkunwaring magchechek-in sa Junction Inn Mansion Hotel.

Nang makita ng mga suspek si San Juan sa lobby ng hotel ay agad nila itong pinagbabaril gamit ang kalibre 45 baril.

Tumakas ang dalawang suspek sakay ng isang tricycle habang ang biktima ay nadala pa sa St. Francis Cabrini Hospital, subalit namatay din ito dahil sa limang tama ng bala sa ibat ibang bahagi ng katawan.