Pulis na galing sa drug raid, itinumba

MANILA, Philippines - Dead-on-the-spot ang isang pulis-Pasay nang ito ay pagbabarilin ng hindi pa nakikilalang suspek habang sakay ng kanyang kotse para katagpuin ang kanyang asset kamakalawa ng gabi sa Las Piñas City.

Ang biktima na nasawi ay  kinilalang si PO3 Ronald Guzman Corsino, 35, nakatalaga sa SAID-SOTG ng Pasay City Police, nagtamo ito ng mga  tama ng bala sa ulo at iba’t ibang bahagi ng katawan.

Batay sa ulat, bago nangyari ang pamamaril sa biktima dakong alas-11:30 ng gabi sa harapan ng Pulang Lupa Dos Health Center, Barangay Pulang Lupa ng naturang lungsod ay kagagaling lang ito sa isang drug operation na tinawag na “One Time Big Time Operation” sa Maricaban, Pasay at patungo sana sa kanyang asset sa Las Piñas nang ito ay pagbabarilin.

Narinig ng isang barangay tanod ang mga putok kaya’t pinuntahan niya ang lugar at dito ay nadatnan ang biktima na duguan sa loob ng kanyang Honda City (LFB-706).

Inaalam ng pulisya kung may nakakabit na CCTV camera sa lugar para makilala ang gunman.