Kuya kinatay ng bunso sa mana

MANILA, Philippines – Hindi na umabot ng buhay sa ospital ang isang 24-anyos na lalaki matapos pagtatagain ng kanyang nakakabatang kapatid kamakalawa sa Brgy. Malangos, Bayambang, Pangasinan.

Ang biktima na nasawi ay kinilalang si Jomar Gallardo, dahil sa tinamong mga tama ng taga sa iba’t ibang bahagi ng katawan.

Arestado naman ang suspek na nahaharap sa kasong kriminal na si Fernando Gallardo, 19.

Batay sa ulat, bago naganap ang insidente bandang ala-1:20 ng hapon sa bahay ng pamilya Gallardo ay pagod na pagod na umuwi ang biktima galing sa bukid at inabutan nito ang nakababatang kapatid na nasa impluwensya ng alak.

Pinag-usapan ng magkapatid ang mamanahing sakahing lupa sa kanilang mga magulang na nauwi sa mainitang pagtatalo at biglang kumuha ng itak ang suspek at pinagtataga nang sunud-sunod ang nakatalikod na kuya na duguang bumulagta sa insidente.