Snatcher na pulis, timbog

MANILA, Philippines – Isang pulis-Quezon City ang inaresto sa isang follow-up operation matapos na hablutin nito ang cellphone ng isang 17-anyos na estudyante at nang pumalag ay kanya pang ginulpi na naganap kamakalawa ng gabi sa Valenzuela City.

Ang  suspek na kinasuhan ng physical injuries at robbery snatching ay kinilalang si PO2 Mike Tanguilan, 31, nakatalaga sa Anti-Carnapping Unit ng Quezon City Police District.

Batay sa imbestigasyon, dakong alas-9:00 ng gabi ay nagbabasa ng mensahe sa kanyang Kata cellphone ang biktimang si Johnric Labadia sa tapat ng kanyang bahay sa No. 459 MacArthur Highway, Brgy. Dalandanan nang pumarada sa harap niya ang suspek na si PO2 Tanguilan lulan ng isang Yamaha Mio scooter.

Walang kaabog-abog na hinablot ni PO2 Tanguilan ang cellphone ng biktima, ngunit nanlaban ito kaya’t paulit-ulit na sinuntok ng pulis ang biktima hanggang sa tumulong ang kapatid ng biktima na si Ronel.

Nakatakas ang suspek tangay ang cellphone  habang naiwan nito ang scooter kaya’t nagsagawa ng follow-up operation ang mga pulis at naaresto si PO2 Tanguilan.