Kolektor ng pawnshop, holdaper napatay

MANILA, Philippines - Agad nasawi ang isang kolektor ng pawnshop nang ito ay pagbabarilin ng tatlong holdaper na sakay sa dalawang motorsiklo  habang napatay naman sa shootout ng nagrespondeng mga pulis ang isa sa mga suspek na naganap kamakalawa sa Brgy. Muzon, San Jose del Monte City, Bulacan.

Ang napatay na biktima dahil sa natamong dalawang tama ng bala ng kalibre 38 baril sa ulo ay kinilalang si Lyndon Umi­sal, ng Valenzuela City, mensahero at kolektor ng Tambunting Pawnshop sa Pabahay, Brgy. Muzon ng lungsod.

Napatay naman ng mga pulis ang isa sa tatlong suspek na nakilala namang si Peter Plarisan Jr., ng  Norzagaray, Bulacan.

Sa ulat, dakong ala-1:30 ng hapon nang hara­ngin ng mga suspek ang biktima na lulan ng motorsiklo sa kalsada ng Melody Plain Subdivision, Brgy. Muzon ng lungsod habang pabalik na ito sa pawnshop.

Agad na pinagbabaril ng dalawang suspek sa ulo ang biktima at kinuha ang clutch bag na naglalaman ng hindi pa madeterminang pera na bahagi ng kaniyang koleksyon.

Nagsagawa ng follow-up operations ang mga pulis at napatay sa shootout si Plarisan sa Graceville I Subdivision sa Brgy. Muzon ng naturang siyudad.

Narekober sa napatay na suspek ang isang cal. 38 revolver na puno ng kargang bala, isang unit ng Yamaha Mio at limang plastic sachet ng shabu.