Pacman binabraso para sumama sa LP Senatorial line up

MANILA, Philippines - Kahit na alam na umano ni DILG Secretary Mar Roxas na nagpahiwatig na noon si Pambansang Kamao at Sarangani Rep. Manny Pacquiao na kung tatakbong itong senador ay sa sasama siya sa tiket ni Vice President Jejomar Binay.

Subalit, nakatanggap ng impormasyon si Buhay partylist Rep. Lito Atienza na patuloy pa umano itong “binabraso” ni Roxas para sumama sa senatorial line up ng Liberal Party (LP).

“May halong veiled threat iyang pangungumbida nila kay Manny. Mar is using everything he can in his current powerful position to generate more support for him,” sinabi pa ni  Atienza.

Nirerespeto naman umano ni Atienza ang desisyon ni Pacquiao kung tatakbo ito o hindi subalit 101 porsiyentong sigurado na hindi ito susuporta kay Roxas.

Hindi naman tinukoy ni Atienza kung anong klaseng pananakot ang ginagawa kay Pacquiao,  subalit naniniwala ito na ang tax case na inihain ng Bureau of Internal Revenue (BIR) ang maaaring ipambala dito.