Bakbakan sa Basilan: 3 utas, 7 sugatan

MANILA, Philippines – Nasawi ang dalawang miyembro ng mga bandidong Abu Sayyaf Group (ASG) at isang sundalo habang pito pa ang nasugatan sa naganap na sagupaan kamakalawa ng umaga sa Brgy. Baiwas, Sumisip, Basilan.

Batay sa ulat na natanggap ni Lt. Sally Christine Magno, Spokesperson ng Joint Task Group (JTG) Basilan na bandang alas-11:00 ng umaga ay kasalukuyang nagsasagawa ng combat operation ang tropa ng militar nang masabat ang nasa 60 bandido sa nasabing lugar na nauwi sa bakbakan.

Tumagal ng ilang minuto ang bakbakan na  ikinasawi ng isang sundalo at ikinasugat ng isa pa sa tropang gobyerno na mabilis na isinugod sa pagamutan para malapatan ng lunas. Habang dalawa ang nasawi sa panig ng mga bandido at anim ang nasugatan.

Ang pinangyarihan ng bakbakan ay kilalang balwarte ng mga bandidong Abu Sayyaf na sangkot sa paghahasik ng terorismo.