Kagawad na pusher inutas sa lamayan

MANILA, Philippines – Hindi na umabot ng buhay ang isang barangay kagawad matapos itong pagbabarilin ng riding in tandem na pinaniniwalaang miyembro ng isang drug syndicate kahapon ng madaling araw sa Malabon City.

Ang biktima na nagtamo ng mga tama ng bala sa iba’t ibang bahagi ng katawan ay kinilalang si Fernando ‘Boy’ Vergara, 58, kagawad ng Barangay Panghulo, residente ng #17 Tahimik St.

Batay sa ulat, dakong alas-4:45 ng madaling araw sa harapan ng isang chapel sa Panghulo Road ay nakikipaglamay ang biktima at kausap nito ang isa sa kaanak ng namatay nang dumating ang isang motorsiklo na walang plaka at sakay ang mga suspek na pawang naka-helmet.

Agad na bumunot ng baril ang mga suspek at walang kaabug-abog na pinagbabaril ang biktima at nang bumulagta ay mabilis tumakas ang mga suspek.

Sa pahayag ng barangay chairman ng Panghulo na si Esmer Borja, may impormasyon sila na si Vergara ay sangkot umano sa droga kung saan isa umano itong tulak at pinagsabihan pa nga aniya ito na tumigil na sa naturang iligal na gawain, subalit hindi nakinig.