Shellfish sa limang lugar sa Visayas Mindanao, may red tide

MANILA, Philippines – Mag-ingat sa pagkain ng mga shellfish sa limang lugar na bahagi ng  Visayas at Mindanao matapos na matukoy na ito ay positibo sa red tide toxin.

Ito ang babala sa publiko ng Department of Health (DOH) matapos na natanggap ang bulletin ng DOH mula sa Bureau of Fisheries and Aquatic Resources (BFAR) na nagbabawal muna sa pagkuha ng pagkain at pagbebenta ng mga shellfish tulad ng tahong, halaan.talaba at iba pang uri nito sa limang coastal areas na kinabibilangan ng Balite Bay sa Mati, Davao Oriental; Dauis sa Bohol, Irong-irong Bay at Cambatutay Bay sa Western Samar, at coastal waters ng Milagros sa  Masbate.

Bukod dito, bawal din muna ang pangunguha ng alamang o shrimp fry dahil hindi ligtas ang mga ito para sa human consumption.

Nilinaw naman ng BFAR na maaaring kumain ng isda, pusit, hipon at alimango na galing sa naturang limang coastal areas, ngunit kailangang tiyaking ang mga ito ay sariwa, nahugasang mabuti, tinanggalan ng bituka at hasang at nilutong mabuti.

Inianunsyo rin naman ng ahensya na inalis na nila ang red tide alert sa coastal waters ng Mandaon sa Masbate matapos na matiyak na ligtas na ito sa red tide.