Maintenance firm ng MRT pumalag sa paninisi ng DOTC

MANILA, Philippines - Dahil sa patuloy na paninisi ng Department of Transportation and Communication (DOTC) sa Global APT ang kumpanyang nagre-repair sa mga riles at tren ng Metro Rail Transit-3  na ikinaiinis ng mga pasahero ay pumalag na ang kumpanya.

Ayon kay Emmanuel Veloso, CEO ng Global APT, noong isang taon pa nila iminungkahi sa tanggapan ni DOTC Sec. Joseph Emilio Abaya na dapat nang palitan ang lahat ng riles sa MRT.

Sinabi ni Veloso, hindi sila dapat sisihin sa patuloy na pagkasira ng mga tren na kadalasang nagdudulot ng abala sa mga pasahero.

Aniya, kahit maglagay ng mga bagong bagon ay wala paring katiyakan na hindi na magkakaroon ng ­aberya sa MRT dahil sa palpak at mahina ng riles ng tren.

Iginiit pa ni Veloso na nagagampanan nila ang lahat ng nakasaad sa kanilang kontrata at wala silang pagkukulang sa kanilang tungkulin.

Ayon naman sa isa pang opisyal ng Global APT na tumangging magpabanggit ng pangalan na kadalasan ay delay umano at pahirapang makasingil sa DOTC sa kanilang serbisyo.