Para iwas sunog, ‘wag magpaputok-BFP
MANILA, Philippines - Nanawagan ang Bureau of Fire Protection (BFP) sa publiko na huwag nang gumamit ng paputok dahil bukod sa nakakasira ng kapaligiran, makapanakit sa tao ay posibleng pagmulan pa ng sunog.
Ito’y matapos ang ginawang inspeksyon ni BFP officer-in-charge Chief Supt. Ariel Barayuga sa mga tindahan ng paputok sa Bocaue, Bulacan at nakita niya ang mga paputok tulad ng “Chinese Sawa” at “El Diablo” na itinuturing na mapanganib.
Ayon kay Barayuga, ginawa nila ang inspeksyon bilang kanilang proyekto na “Oplan Paalala 2014: Iwas Paputok, Sakuna at Sunog”, upang matiyak na ligtas sa sunog ang publiko.
“Maayos naman po ang inspeksyon generally pero ang problema, mayroon pong ibang establisyemento na pagkatapos ng unang inspeksyon ng ating mga tao ay saka na inilalagay ang mga imported at illegal na mga paputok na atin pong ipinagbabawal,” sabi ni Barayuga.
Inamin ng opisyal na hindi maalis na marami pa rin ang tumatangkilik sa paggamit ng paputok kung kaya pinaalalahanan niya ang mga ito na bumili ng mga regulated na paputok.
- Latest
