Trike driver binaril sa ulo

MANILA, Philippines – Isang tricycle driver ang nasawi nang ito ay barilin sa ulo ng hindi pa kilalang suspek kamakalawa ng gabi sa Tondo, Maynila.

Hindi na umabot ng buhay sa Gat Andres Bo­nifacio Memorial Medical Center  ang biktimang si   Juharis Angas Kasan, 27, tubong Maguindanao.

Batay sa ulat, bandang alas-6:30 ng gabi sa kanto ng Asuncion at Zaragosa Sts., Tondo ay nakaupo at nag-aabang ang biktima  ng pasahero nang duma­ting ang suspek.

Inakala ng biktima na pasahero at sasakay ang suspek, subalit bigla na lamang bumunot ito ng baril at malapitang pinaputukan sa ulo.

Malaki ang hinala ng pulisya na may kinalaman sa droga ang pamamaslang lalo pa’t ang lugar umano ay sinasabing bagsakan ng droga.