Paslit napatay ng lasing na tatay
MANILA, Philippines – Dahil umano sa sobrang kalasingan ay aksidenteng nabaril at napatay ng isang tatay ang kanyang 10-anyos na anak na lalaki na naganap kamakailan sa Caloocan City.
Ang suspek na nakakulong sa Caloocan police detention cell at kinasuhan ng parricide ay kinilalang si Glenn Guttierez, 44, residente ng Lot 7-E, Phase 3, Hipon Alley, Dagat-Dagatan ng naturang lungsod.
Ang nasawi ay kinilalang si Jefferson Guttierez, na nagtamo ng tama ng bala sa dibdib.
Sa naantalang ulat ng Caloocan City Police, dakong alas-10:45 ng gabi noong Nobyembre 20 ay natutulog ang biktima at ang ate nitong si Glenda sa sofa ng kanilang bahay nang dumating ang ama na lango sa alak.
Dito ay pinaglaruan nito ang hindi pa mabatid na kalibre ng baril hanggang sa biglang pumutok at tinamaan ang natutulog na anak.
Nawala ang pagkalasing ng ama at siya na mismo ang nagsugod sa anak sa Caloocan City Medical Center, subalit namatay din ito habang nilalapatan ng lunas.
- Latest
