Sementong monoblock bumagsak:2 karpintero utas

MANILA, Philippines - Idineklarang dead-on-arrival ang dalawang karpintero habang isa ang nasugatan matapos na sila ay mabagsakan ng sementadong monoblock mula sa ika-14 palapag ng ginagawang gusali sa Quezon City, kamakalawa.

Nakilala ang mga nasawing sina Reynaldo Talento, 50, Taytay Rizal; at Arsie Pelong, 38, ng Cabilang Baybay, Carmona, Cavite. Habang ang nasugatan na kasalukuyang nakaratay sa ospital ay si Peter Gemao, 39, ng Mandaluyong City.

Sa imbestigasyon ni SPO1 Joselito Gagaza, dakong alas-4:00 ng hapon nang mangyari ang insidente sa One Eastwood Tower 1 na matatagpuan sa Eastwood City, Brgy. Bagumbayan.

Sa salaysay sa pulisya ni Jimmy Estrabella, at dalawa pang kasama na sila ay nasa ika-14 na palapag ng natu­rang gusali at abala sa  pagsisimento ng hagdanan gamit ang chain monoblock nang bigla itong nagiba.

Nagkataon ang mga nasawing  sina Talento at Pelong ay nasa ika-12 nang tamaan ng na pre-cast na hagdan.Habang nasa ground floor naman nang tamaan si Gemao.