Buntis sinaksak ng selosong lover

MANILA, Philippines – Isang ginang na anim na buwang buntis ang nasa kritikal na kondisyon matapos na ataduhin nang saksak ng live-in partner habang sila ay nagtatalo kamakalawa ng gabi sa El Salvador City, Misamis Oriental.

Kinilala ang biktimang si Jonalyn Mantos, na nilalapatan ng lunas sa ospital sanhi ng tinamong walong tama ng saksak ng gunting sa iba’t ibang bahagi ng katawan.

Agad namang nadakip ang suspek na si alyas Bong sa isang follow-up operations.

Batay sa ulat, dakong alas-7:00 ng gabi ay nagkaroon ng mainitang pagtatalo ang mag-live-in nang sitahin ng suspek ang biktima na may nanliligaw dito.

Nairita ang biktima dahil paano anya siya liligawan ay buntis na siya.

Nagtalo ang dalawa  hanggang sa kumuha ng gunting ang suspek at pinagsasaksak ang biktima ng  walong beses sa iba’t ibang bahagi ng katawan at sa kabutihang palad ay hindi nadamay ang sanggol na nasa sinapupunan nito.

Nahaharap ang suspek sa kasong kriminal na nakakulong na ngayon.