Shabu sa mall: 2 tiklo

MANILA, Philippines - Inaresto ng mga operatiba ng Philippine Drug Enforcement Agency (PDEA) ang dalawang babae kabilang ang dalagita sa isang shabu buy bust operation sa isang mall sa Cubao, Quezon City.

Ang dalawang suspek ay kinilalang sina Anjanette Matus, 41, at isang alyas Mita, 15, na residente ng Cangatba, Porac, Pampanga at nasamsam sa kanila ang 150 gramo ng shabu.

Sa ulat, dakong alas-8:30 ng gabi nang magsagawa ng shabu buy bust operation ang PDEA Regional Office-National Capital Region (PDEA-RONCR) sa isang kilalang fastfood chain sa loob ng isang mall sa Cubao, Quezon City.

Nagkunwaring bibili ng iligal na droga ang isang PDEA agent sa mga suspek at nang magpalitan ng items ay saka dinampot ng nakaantabay na mga operatiba.